Fomentar a implicación das familias e dinamizar a asociación foi un dos obxectivos que a Xunta Directiva da ANPA do CPI Camiño De Santiago se marcou o pasado mes de novembro, cando asumimos o compromiso de poñernos á fronte deste gran colectivo.
Hoxe damos un paso máis coa publicación da nosa páxina web, coa que queremos trasladar ás familias e ao alumnado todas as actividades e iniciativas que temos en marcha, ao tempo que queremos facilitar unha comunicación fluída con todos vós, aproveitando as novas tecnoloxías.
Nesta páxina web poderás coñecer aos membros da ANPA, os estatutos da Asocaición e tamén os acordos das asembleas, todo elo dende a sección ANPA.
No apartado dedicado ás Actividades poderás atopar aquelas iniciativas que temos en marcha para complementar a formación do alumnado con actividades extraescolares. Tede en conta que, ademais das que organizamos dende a Asociación, o Concello de O Pino ten tamén unha ampla e variada oferta de actividades para as nosas fillas e fillos.
No apartado de Servizos podes atopar información sobre Madrugadores, un servizo que presta unha empresa externa e que permite a moitas familias conciliar o seu horario laboral co escolar.
Para coñecer os horarios e participar nas actividades extraescolares ou facerte socio da ANPA poñemos á túa disposición os formularios que podes atopar na sección Impresos. Moitos deles pódense cubrir directamente no ordenador ou imprimilos e deixalos no local da ANPA, que se atopa no CPI Camiño de Santiago.
A través dos formularios de contacto que figuran tanto na páxina principal como na sección de contacto podedes enviarnos as suxerencias e peticións de información que consideredes oportuno.
A través desta sección de novas iremos contando todo o que facemos e publicando os avisos para manter informadas ás familias do CPI Camiño de Santiago.