Papá Noel solicita facer unha videoconferencia cos nenos e nenas do colexio

Papá Noel, o Apalpador e os Reis Magos puxéronse en contacto co Concello do Pino para que tranquilizase a toda a rapazada do municipio. Estaban preocupados porque as autoridades sanitarias, co obxecto de frear o avance da pandemia da covid-19, non deixan que se reúna moita xente. Pero, por suposto, estes ilustres persoeiros teñen solución para todo. Conseguiron salvocondutos para poder saltar os peches e van achegarse ao Pino como todos os anos. Iso si, as súas visitas serán un pouco especiais. Papá Noel xa pediu facer unha videoconferencia. Estará o luns no seu salón da Casa da Cultura e falará desde alí con todos os nenos e nenas de infantil e primeiro e segundo de primaria do cole. Ademais, deixa un buzón para que lle deixedes as cartas con todas as vosas peticións e tamén se puxo dacordo co Apalpador e os Reis Magos para compartir unha dirección de correo electrónico na que lles podedes transmitir os vosos desexos a calquera deles. É nadal@opino.gal. Están desexando recibir os vosos correos para lelos moi atentamente. Xa sabedes que ides poñer?